62

راحت فتح علی خان کو ڈاکٹریٹ کی ڈگری کل ملے گی

پاکستانی گلوکار راحت فتح علی خان کو آکسفورڈ یونیورسٹی ڈاکٹریٹ کی اعزازی ڈگری دے گی۔

برطانیہ کی آکسفورڈ یونیورسٹی راحت فتح علی خان کو کل بدھ کو موسیقی میں گراں قدر خدمات پر اعزازی ڈگری دے گی۔

نامور گلوکار راحت فتح علی خان نے کہا ہے کہ دنیا کے نامور تعلیمی ادارے سے ڈاکٹریٹ کی اعزازی ڈگری ملنا میرے لیے اعزاز کی بات ہے اور مجھے بے انتہا خوشی ہے کہ موسیقی سے لگاؤ نے آج مجھے بلندیوں تک پہنچا دیا۔

اعزازی ڈگری ملنے کے بعد راحت فتح علی خان 27 جون کو اکسفورڈ ٹاؤن ہال میں پر فارم بھی کریں گے۔

واضح رہے کہ آکسفورڈ یونیورسٹی کی تقریب میں 8 افراد کو خدمات کے اعتراف میں اعزازی ڈگری سے نوازا جائے گا جبکہ موسیقی کے میدان میں دنیا بھر سے 2 افراد کو منتخب کیا گیا ہے۔ موسیقی سے منتخب ہونے والی دوسری شخصیت ’’یویوما‘‘ کا تعلق چائنہ سے ہے۔

یاد رہے کہ سال 2017 میں آکسفورڈ یونیورسٹی کے ریہرسل ہال کو راحت فتح علی خان کے نام سے منسوب کیا گیا تھا۔

کچھ عرصہ قبل راحت فتح علی خان نے کراچی میں پریس کانفرنس کرتے ہوئے کہا تھا کہ آکسفورڈ یونیورسٹی سے ملنے والے ڈگری کو اپنے خاندان کے نام کرتا ہوں۔

اُن کا کہنا تھا کہ میرے 1200 سے زیادہ شاگرد ہیں جو قوالی سیکھ رہے ہی اور یہ فن 600 سال سے موجود ہے۔ وہ سب سے پہلے پاکستان اور پھر دوسرے ممالک کو ترجیح دیتے ہیں۔

راحت فتح علی خان نے سال 2010 میں برطانیہ کے ایشیائی موسیقی اعزازات میں ’’بہترین بین الاقوامی ایکٹ‘‘ کا اعزاز جیتا تھا۔

اس خبر پر اپنی رائے کا اظہار کریں

اپنا تبصرہ بھیجیں