اسلام آباد: مسلم لیگ (ن) کے سینئر رہنما محمد زبیر نے کہا ہے کہ حفیظ شیخ کی گاڑی پر پاکستانی جھنڈا لگتا ہے تو پاکستان آتے ہیں، جس دن حکومت جاتی ہے وہ بھی بیرون ملک چلے جاتے ہیں، تحریک انصاف کی حکومت بہت جلد جانے والی ہے، حفیظ شیخ ٹکٹ کرا لیں۔
محمد زبیر کا پریس کانفرنس سے خطاب میں کہنا تھا کہ عمران خان نے کہا تھا کہ سابق حکومت نے بہت قرضے لیے۔ ہم نے پانچ سال میں 10 ہزار 500 ارب قرض لیا تھا، یہ پیسے کہاں خرچ ہوئے، ہمارے پاس مکمل حساب ہے۔ موجودہ حکومت نے سب سے زیادہ قرضے لیے۔
لیگی رہنما کا کہنا تھا کہ حفیظ شیخ کے تمام اثاثے ملک سے باہر ہیں، ان کا پی ٹی آئی سے کوئی تعلق نہیں، وہ جیسے ہی آئے، پاکستان کا 15 روز میں آئی ایم ایف کے ساتھ معاہدہ ہو گیا۔ عمران خان ماضی میں کہتے تھے کہ حفیظ شیخ نے معیشت تباہ کردی۔
