اسلام آباد میں وزیر خارجہ شاہ محمود قریشی سے ترک ہم منصب نے ملاقات کی ہے، جس میں دو طرفہ تعلقات اور خطے کی صورتحال پر بات چیت کی گئی۔
وزیر خارجہ شاہ محمود قریشی نے ترک وزیر خارجہ کا پرتپاک خیر مقدم کیا۔ ترک وزیر خارجہ نے وزارتِ خارجہ کے لان میں پودا بھی لگایا۔ میولوت چاوش اوغلو پاکستان کے دورے کے دوران وزیر اعظم عمران خان سمیت اعلیٰ قیادت سے ملاقاتیں بھی کریں گے۔ ان ملاقاتوں میں پاکستان اور ترکی کے مابین دو طرفہ تعلقات، مختلف شعبہ جات میں دو طرفہ تعاون سمیت باہمی دلچسپی کے امور پر تفصیلی تبادلہ خیال کیا جائے گا۔
دوسری جانب ایوان صدر میں ترک وزیر خارجہ کو ہلال پاکستان دینے کی پروقار تقریب ہوئی۔ جس میں ڈاکٹر عارف علوی نے ترک وزیر خارجہ میولوت چاوش اوغلو کو ایوارڈ سے نوازا، اہم شخصیات نے بھی شرکت کی۔
