کوئٹہ میں سبزیوں کی قیمتوں کے ساتھ ہی گوشت، دالیں، چینی اور آٹے سمیت اشیا مہنگی ہونے پر شہریوں کے ہوش اڑ گئے۔ 80 روپے کلو بکنے والا ٹماٹر اب 140 کے ریٹ پر فروخت ہونے لگا ہے، قیمتوں میں اضافے نے عوامی مشکلات بڑھا دیں۔
کوئٹہ میں عوام کے لئے مہنگائی کا طوفان تھمے کا نام ہی نہیں لے رہا، کبھی سبزیاں مہنگی تو کبھی انڈے، کبھی چینی کا بحران تو کبھی مصالحہ جات کی قیمتیں بڑھ گئیں۔ اب تو گوشت اور پھلوں کی قیمتیں بھی آسمان سے باتیں کرنے لگی ہیں۔ ٹماٹر 80 روپے سے بڑھ کر 140 روپے کلو، لہسن 100 روپے اضافے کے ساتھ 650 سو روپے جبکہ ادرک 250 سے بڑھ کر 300 روپے کلو فروخت ہونے لگا۔
دیگر روزمرہ استعمال کی سبزیوں سمیت گوشت اور پھلوں کی قیمتوں میں اضافے نے عوام کو پریشان کر دیا ہے۔ مہنگائی سے جہاں والدین مشکلات کا شکار ہیں وہیں بچے بھی پھل فروٹ نہ ملنے پر حکمرانوں سے گلہ کرتے نظر آتے ہیں۔
سبزیاں ہی نہیں بکرے کا گوشت سرکاری نرخ نامے کے مطابق 950 روپے مقرر ہونے کے باوجود بھی شہری 1150 سو سے 1300 سو تک خرید نے پر مجبور ہیں۔
شہریوں کا ہر بار کی طرح اس بار بھی یہی مطالبہ ہے کہ پرائس کنٹرول کمیٹی کی جانب سے سبزی منڈی اور دیگرعلاقوں میں گراں فروشوں کے خلاف کاروائی کی جائے۔
